Франция құрамасы Ұлттар лигасы топтық кезеңінің төртінші турында Бельгияны 4:1 есебімен ұтты. Кездесу Францияның Сен-Дени қаласындағы "Стад де Франс" стадионында өтті, деп хабарлайды Vesti.kz.
Есепті Бельгия аштыАлаң иелері кездесуді белсенді бастағанымен, бірінші болып бельгиялықтар гол соқты. 35-минутта лиссабондық "Бенфика" клубының вингері Доди Лукебакио мүмкіндігін сәтті пайдаланып, қонақтарды алға шығарды.
Франциялықтарға қарсыластың голына жауап беру оңайға соқпады. Бельгия құрамасы матчтың соңғы ширегіне дейін минималды басымдықты сақтап тұрды.
Франция есепті теңестіріп, соңында қарсыласын талқандадыОйын барысындағы шешуші өзгеріс 77-минутта болды. Францияның "Пари Сен-Жермен" клубының шабуылшысы Дезире Дуэ есепті теңестірді.
Арада төрт минут өткенде ағылшынның "Манчестер Сити" клубының жартылай қорғаушысы Райан Шерки Францияның екінші голын соғып, Зинедин Зидан шәкірттерін алға шығарды. 88-минутта мюнхендік "Баварияның" вингері Майкл Олисе алаң иелерінің басымдығын арттырды.
Қосылған уақытта Олисе бельгиялықтардың қақпасын тағы да дәл көздеп, дубль жасады және матчтың соңғы есебін белгіледі - 4:1.
Төрт турдан кейін Франция құрамасы 10 ұпай жинап, 1-топта жеке-дара көш бастап келеді. Зидан шәкірттері үшін бұл жеңіс турнирдегі кезекті сәтті нәтиже болды.
Марк ван Боммель жаттықтыратын Бельгия құрамасының еншісінде алты ұпай бар. Команда турнир кестесінде үшінші орында келеді.