Футболдан 2026 жылғы әлем чемпионатында Аргентинада ұлттық құраманың шабуылшысы Лионель Мессидің отбасына қатысты медиалық дау туындады, деп хабарлайды Vesti.kz.
Не болды?
Luzu TV танымал стриминг платформасының жүргізушісі Флоренсия Пенья тікелей эфир барысында Аргентина құрамасының капитаны Лионель Мессидің әкесі Хорхе Месси қайтыс болды деген мәлімдеме жасаған.
"Ешкімнің көңілін түсіргім келмейді, бірақ, Мессидің әкесі жаңа ғана қайтыс болды. Бұл әлем чемпионаты өтіп жатқан кезде болды", – деп келтіреді журналистің сөзін Infobae.
Алайда көп ұзамай бұл ақпараттың шындыққа жанаспайтыны белгілі болды.
Сол бағдарламаның өзінде Пенья бұл мәлімет тек қауесет деңгейінде тарағанын және оны ешбір сенімді дереккөз растамағанын мойындады.
"Бұл ақпарат әлеуметтік желілерде тарап, интернетте талқыланып жатыр. Бірақ бұқаралық ақпарат құралдарынан ешқандай растау жоқ. Біз тексеруді жалғастырып жатырмыз", – деді жүргізуші.
Кейіннен Лионель Мессидің отбасы ресми мәлімдеме жасап, Хорхе Мессидің денсаулығында белгілі бір мәселелер бар екенін және дәрігерлердің бақылауында екенін растады. Алайда оның қайтыс болғаны туралы ақпараттың жалған екені айтылды.
"Мессидің отбасы Хорхе Мессидің қазіргі уақытта денсаулығына байланысты белгілі бір жағдайды бастан өткеріп жатқанын хабарлайды.
Қазір ол дәрігерлердің бақылауында. Қалпына келу процесі жалғасып жатыр және жағдайы оң динамика көрсетуде", – деп жазады Guillem Balague.
Сонымен қатар, Аргентина құрамасы капитанының жақындары отбасы мүшесінің денсаулығына қатысты тексерілмеген ақпараттың таралуына наразылық білдірді.
Даудың салдары
Luzu TV басшылығы ресми мәлімдеме жасап, құпия сипаттағы ақпаратты мұқият тексерусіз жариялауды қабылдауға болмайтынын атап өтті. Осы оқиғадан кейін Флоренсия Пеньямен және жанжалға қатысы бар бірқатар қызметкерлер жұмыстан шығарылғаны хабарланды.
"Болған жағдайға қатты өкінеміз. Біздің редакция жауапты әрі құрметке негізделген журналистика қағидаттарын ұстанады. Расталмаған мұндай ақпаратты тарату аталған стандарттарға қайшы келеді", – деп келтіреді Infobae.
Ал Флоренсия Пенья кейіннен көпшілік алдында кешірім сұрап, қате ақпарат таратқанын мойындады.
Жарнама