"Қайраттың" бас бапкері Рафаэль Уразбахтин Чемпиондар лигасындағы екі ірі жеңілістің командаға әсері қандай болады деген сұраққа жауап берді, деп хабарлайды Vesti.kz.
Алматылықтар жалпы кезеңнің басында сырт алаңда португалиялық "Спортингтен" 1:4 есебімен ұтылса, екінші турда Алматыда "Реалға" 0:5 есебімен ойсырап қалды.
"Шындыққа тура қарайықшы. Олардың құрамы - 1 миллиард 400 миллион еуро, ал біздікі - 12 миллион. Бір ғана ойыншысының бағасы бүкіл біздің чемпионаттан қымбат. Біздің клубтар топтық кезеңге жиі шығуы керек. Былтыр "Астана" "Челсиді" әкелді, биыл біз - "Реалды". Мүмкін бұл футболымыздың дамуына әсер етер. Жаңа стадиондар салынып қалар?!
Біз қай деңгейде тұрғанымызды жақсы түсінеміз. Сондықтан "Спортингтен" 1:4 және "Реалдан" 0:5 есебімен ұтылу бізге ауыр соққы болады деп ойламаймын. Мбаппе немесе Винисиусты қалай қуып жетуге болады? Тек осындай матчтар арқылы ғана дамуымыз мүмкін", - деді Уразбахтин.