Мадридтік "Реалда" Винисиус Жуниорға қатысты жағдай ушығып барады. Ол клуб және бапкер арасындағы келіспеушілік салдарынан екі оттың арасында қалды, деп хабарлайды Vesti.kz.
Винисиус көмекші болуға келіспейді
"Реал" басшылары мен Хаби Алонсо бразилиялық шабуылшы үшін ең тиімдісі командада көшбасшысы болып тұрған Килиан Мбаппеге ойнап беру деп есептейді.
Франциялық шабуылшы "корольдік клубтың" басты гол соғушысы және негізгі ойыншысына айналды. Ал бұл шабуылдағы барлық серіктестерінен оны толық қолдауды талап етеді.
Алайда Don Balon мәліметінше, Винисиус мұндай рөлмен келіспейді. Ол өзін көмектегі ойыншы емес, шабуылды алға сүйрейтін көшбасшы ретінде көреді. Бразилиялық футболшы өзінің амбициясы мен клубтағы үздік ойыншы болуға деген ұмтылысы Мбаппеге орын беру талабымен шектеліп жатқанын сезінеді.
Винисиус "Реалдағы" болашағын қайта қарауда
Бразилиялық футболшы 2027 жылы аяқталуы тиіс келісімшартты ұзарту жөніндегі келіссөздерді уақытша тоқтатты. Бұл шешім клубтың оның командалық рөліне қатысты талабынан кейін қабылданған.
Бұл жағдай Винисиустың "Реалдағы" болашағына күмән тудырып отыр. Ол әлі де алаңдағы маңызды ойыншы болып қалып, жақсы нәтижелер көрсетіп жүргенімен, Мбаппемен байланысты қазіргі жағдай оның клубта қалу туралы шешімін өзгертуі мүмкін.
Егер ол өзіне тиісті бағасын ала алмаса және еленбегенін сезіне берсе, Винисиус келесі жазда клубтан кетуге шешім қабылдауы ықтимал.
Жарнама