Мадридтік "Реал" мен Испания құрамасының аңызға айналған қақпашысы Икер Касильяс португалиялық "Порту" клубынан көп миллиондық өтемақы өндіріп алуға ниетті, деп хабарлайды Vesti.kz AS басылымына сілтеме жасап.
Дереккөз мәліметінше, бұрынғы қақпашы португалиялық клубтың жаттығуларының бірінде болған жүрек талмасына байланысты өзіне 3,7 миллион еуро төлеуді талап етіп отыр.
Касильястың пікірінше, бұл жағдайға жаттығу барысында берілген шамадан тыс физикалық жүктеме себеп болған. Бұрынғы футболшының айтуынша, бастан өткерген жүрек талмасы оның кейінгі өмірі мен мансабына елеулі әсер еткен.
"Мен спортзалға барамын, падел ойнаймын, бірақ көп жүгіре алмаймын. Ең көбі 50 метрге дейін ғана жүгіре аламын", - деді бұрынғы қақпашы сот тыңдауы кезінде.
Еске салайық, 2019 жылдың мамыр айында испаниялық футболшы "Порту" жаттығуы кезінде инфаркт алған болатын. Біраз уақыттан кейін ол кәсіпқой карьерасын аяқтау туралы шешім қабылдады.
Касильяс футболдан кететінін ресми түрде 2020 жылдың жазында жариялаған еді.
Жарнама