Мадридтік "Реалдың" баспасөз қызметі Испания Кубогындағы даулы жеңілістен кейін Дани Карвахальдың жанкүйерлерге жолдаған үндеуінің толық мәтінін жариялады, деп хабарлайды Vesti.kz.
Сәрсенбі, 14 қаңтарда мадридтіктер турнирден сенсациялық түрде шығып қалды. Олар 1/8 финалда Сегундада небәрі 17-орында тұрған "Альбасетеден" ұтылды. Матч 2:3 есебімен мадридтіктердің жеңілісімен аяқталып, бұл нәтиже "Реалдың" осы маусымдағы ең ірі сәтсіздіктерінің бірі болды.
"Бүгін түптің түбіне жетіп, масқара болдық. Бізді турнирден Сегунда командасы шығарып тастады, мен оларды құттықтаймын. Ертеңнен бастап біз жеке де, ұжым ретінде де өзімізге қатал талап қоюымыз керек. Маусымның барысын өзгертуге әлі уақыт бар. Алдымызда екі керемет турнирде жеңіс үшін күрес күтіп тұр. Қазір команда бабында емес, сондықтан бізге көп еңбек ету қажет.
Барлығымыз бар күшімізді салуымыз керек - бұл шындық. Айтарымыз да осы: біз жүз пайызға жұмыс істеуіміз тиіс. Сондай-ақ, жанкүйерлерден кешірім сұраймыз және ең алдымен мен бұл клубтың деңгейі мен үмітіне сай болмадым. Алдағы бірнеше айда жағдайды өзгерту үшін матчтарда барымызды салуға уәде береміз", - деді Карвахаль.
"Альбасетемен" өткен бұл кездесу "Реалдың" жаңа бас бапкері Альваро Арбелоа үшін клуб тізгініндегі алғашқы ойыны болды. Ол бұл қызметте Хаби Алонсоны алмастырған еді.