Мадридтік "Реал" клубының бас бапкері Альваро Арбелоа Чемпиондар лигасының ширек финалындағы алғашқы матчта мюнхендік "Бавариядан" ұтылғандарына қатысты пікір білдірді, деп хабарлайды Vesti.kz.
Кездесу "Сантьяго Бернабеу" стадионында өтіп, 2:1 есебімен қонақтардың пайдасына аяқталған еді.
Арбелоаның айтуынша, команда әлі де қарсыласымен тең дәрежеде күрес жүргізе алады:
"Біз әлі ойындамыз, бұл анық. Бізге тек бір гол жетіспейді. Біз кез келген алаңда жеңе аламыз. 0:2 болғанда есе қайтару өте қиын болар еді. Біз тым қатты қорғандық, әсіресе вингерлер. Бұл біздің жоспарда болмаған еді. Осы арқылы қарсыласқа тым көп еркіндік бердік. Доппен ойнағанда жауапкершілікті өз мойнына алатын сәттер жетіспеді. Олардың прессингі өте агрессив болды", - деді ол.
Сондай-ақ, бапкер екінші голдың командаға ауыр соққы болғанын атап өтті:
"Біз допты жоғалтпау туралы көп айттық. Бірақ екінші гол жағдайды қиындатты. Соған қарамастан, команда мінез көрсетті. Бізде әлі де мүмкіндік бар деген сенім бар. Тіпті 1:2 есебінде де тәуекелге бардық. Бірақ "Реал" кез келген алаңда жеңе алатын команда", - деп қосты Альваро Арбелоа.
Қарымта матч 16 сәуірге қараған түні Мюнхендегі "Альянц Арена" стадионында өтеді.
Жарнама