УЕФА Чемпиондар лигасы 1/8 финалындағы бірінші матчта франциялық "Пари Сен-Жермен" өз алаңында "Челсиді" ірі есеппен ұтты, деп хабарлайды Vesti.kz.
Кездесу Париж қаласында өтіп, 5:2 есебімен алаң иелерінің пайдасына аяқталды.
Ойынның 10-минутында Брэдли Баркола есеп ашып, париждіктерді алға шығарды. 28-минутта лондондық клуб есепті теңестірді - қорғаушы Мало Гюсто шабуылға қосылып, гол соқты.
Алайда бірінші тайм аяқталар алдында "Пари Сен-Жермен" қайтадан алға шықты. 40-минутта Усман Дембеле қарсы шабуылды сәтті аяқтады. Бұл шабуыл қақпашы Матвей Сафонов жасаған сейвтен кейін басталған.
Екінші таймда Челси тағы да есепті теңестірді. 58-минутта жартылай қорғаушы Энцо Фернандес мергендік танытты.
Дегенмен 74-минутта Витинья дәл соққымен париждіктерді қайтадан алға шығарды. Матч соңында Хвича Кварацхелия екі гол соғып, кездесудің тағдырын анық шешті. Ол 86-минутта бір рет мергендік танытып, 90+4-минутта дубль жасады.
Қарымта матч 17 наурызда Лондон қаласындағы Стэмфорд Бридж стадионында өтеді.
Жарнама