Футболдан Португалия құрамасының бас бапкері Жорже Жезуш шабуылшы Криштиану Роналдуды Ұлттар лигасының қарашадағы матчтарына қатыстырмақ, деп хабарлайды Vesti.kz сайты A Bola басылымына сілтеме жасап.
Дереккөз мәліметінше, шабуылшы бапкердің жоспарын біліп отыр. Жезуш жанжалды созбалаңға салмай, Роналду ұлттық құрама сапында өнер көрсетуін жалғастыруы керек деп есептейді.
Жезуш татуласуға дайын
A Bola мәліметінше, Жезуш Роналду кеткеннен кейін Португалия құрамасының жұмысын шиеленісті жағдайда жалғастырғысы келмейді.
Португалиялық маман халықаралық карьерасын аяқтау туралы шешімді тек Роналдудың өзі қабылдауы керек деп санайды.
Сондай-ақ Жезуш ұлттық құраманың капитанының командадан кетуін өз атымен байланыстыр,ысы келмейді. Егер Роналду карьерасын аяқтау туралы шешім қабылдаса, бапкер оған ұлттық командамен лайықты түрде қоштасуға мүмкіндік беруге дайын.
Роналду ұлттық құрамадан жанжалмен кетті
Еске салайық, Роналду Ұлттар лигасының үшінші турында Данияға қарсы өткен матчтың алдында ұлттық құраманың орналасқан жерінен кетіп қалған болатын. Бұл кездесу Португалияның 4:2 есебімен жеңісімен аяқталды. Оның кетуі футболшы мен бас бапкер арасында келіспеушілік бары туралы ақпарат тараған тұста болды. Алайда Жезуш бұған дейін де шабуылшымен арасында ешқандай жанжал жоқ екенін мәлімдеген.
Португалияның бірқатар бұқаралық ақпарат құралдары Роналдудың ұлттық құрамадағы өнерін аяқтауы мүмкін екенін хабарлады. Сондай-ақ Жезуш жағдайды реттеу үшін шабуылшымен кездесуге келіскені белгілі болды.
Португалия плей-оффқа мерзімінен бұрын жолдама алды
Төрт матчтан кейін Португалия 12 ұпай жинап, 4-топта көш бастап тұр. Команда Ұлттар лигасының ширек финалына жолдаманы мерзімінен бұрын қамтамасыз етті.
Қараша айында португалиялықтар Дания және Уэльс құрамаларымен кездеседі. Бұл матчтар Роналдудың ұлттық құрама сапындағы келесі ойындары болуы мүмкін.
41 жастағы Роналду Португалия құрамасында 2003 жылдан бері өнер көрсетіп келеді. Ұлттық команда сапында футболшы 2016 жылы Еуропа чемпионатында және екі рет Ұлттар лигасында жеңімпаз атанды. Сондай-ақ ол ұлттық құрама сапындағы ойын саны (233) және гол саны (146) бойынша рекордшы.
Жарнама