Алматыда Чемпиондар лигасының шешуші кезеңіндегі қарымта матчте "Қайрат" пен Шотландияның "Селтик" клубы ойыны өтті, деп хабарлайды Vesti.kz.
Өзалаңында ойнағанына қарамастан "Қайрат" алғашқы минуттардан-ақ қысымға ұшырады. Глазгодан келген қонақтар допты жиі бақылауда ұстады, ал Рафаэль Уразбахтиннің командасы жылдам шабуылдарға және допты қарсыластың айып алаңына жеткізуге басымдық берді.
Бірінші таймда екі команда да екі соққыдан жасады, алайда қақпаға дәл соққыны тек "Селтик" тіркеді – Темірлан Анарбеков шотландиялық ойыншының соққысын сенімді қайтарды.
Екінші таймда алматылықтар есеп ашуға керемет мүмкіндік алды: "Селтик" қақпашысы өз қорғаушысынан келген пасты қолмен ұстағаны үшін төреші айып алаңы ішінде еркін соққы белгіледі, алайда "Қайрат" бұл сәтті тиімді пайдалана алмады. Ойын соңында шотландиялықтар жеңісті жұлып алуға шақ қалды — шабуылшы Анарбековпен жеке шықты, бірақ соққысы дәл болмады.
Негізгі 90 минут 0:0 есебімен аяқталды. Қосымша уақытта да есеп өзгермеді, және матчтың тағдырын пенальти сериясы шешті. Онда "Қайрат" 3:2 есебімен жеңіске жетіп, өз тарихында алғаш рет Чемпиондар лигасының топтық кезеңіне жолдама алды.
Ал "Селтик" енді Еуропа лигасында өнер көрсетеді.
Жарнама