Бүгін, 24 маусымға қараған түні АҚШ, Канада және Мексикада өтіп жатқан футболдан 2026 жылғы әлем чемпионаты топтық кезеңнің екінші туры аясында төрт матч ойналады, деп хабарлайды Vesti.kz.
Португалия – Өзбекстан (22:00, K тобы)
Орталық Азия жанкүйерлері үшін күннің басты кездесуі Португалия мен Өзбекстан құрамалары арасындағы матч болмақ. Ойын Астана уақытымен 22:00-де басталады.
Бірінші турда португалиялықтар топ фавориті саналғанына қарамастан, Конгомен 1:1 есебімен тең түсіп, күтпеген жерден ұпай жоғалтты. Ал Өзбекстан құрамасы Колумбиядан 1:3 есебімен ұтылып, енді плей-оффқа шығу мүмкіндігін сақтау үшін оң нәтижеге қол жеткізуге тырысады.
Англия – Гана (01:00, L тобы)
Астана уақытымен 01:00-де Англия мен Гана құрамалары алаңға шығады.
Ағылшындар турнирді Хорватияны 4:2 есебімен жеңуден бастаса, ганалықтар Панаманы 1:0 есебімен ұтып, үш ұпай еншіледі. Бұл матчтың жеңімпазы плей-офф жолдамасын мерзімінен бұрын қамтамасыз етуі мүмкін.
Панама – Хорватия (04:00, L тобы)
04:00-де L тобындағы тағы бір кездесу өтеді. Панама құрамасы Хорватиямен кездеседі.
Екі команда да алғашқы турда жеңіліске ұшырады. Панама Ганадан жеңілсе, хорваттар Англияға жол берді. Сондықтан бұл ойын екі құрама үшін де турнирлік тағдыр тұрғысынан аса маңызды болмақ.
Колумбия – ДР Конго (07:00, K тобы)
Ойын күнін Колумбия мен Конго құрамалары арасындағы кездесу қорытындылайды. Матч Астана уақытымен 07:00-де басталады.
Колумбия алғашқы турда Өзбекстанды 3:1 есебімен ұтты. Ал Конго Португалиядан ұпай алып (1:1), бірінші турдың басты сенсацияларының біріне айналды.
23-24 маусым күндеріне арналған матчтар кестесі (Астана уақытымен):
• 22:00 — Португалия – Өзбекстан (K тобы);
• 01:00 — Англия – Гана (L тобы);
• 04:00 — Панама – Хорватия (L тобы);
• 07:00 — Колумбия – ДР Конго (K тобы).
Еске салайық, әлем чемпионаты 11 маусымда басталды. Ал финалдық кездесу 19 шілдеде өтеді.
Жарнама