Оңтүстік Корея құрамасы Қатардағы әлем чемпионатының 1/8 финалына шықты, деп хабарлайды Vesti.kz тілшісі.
Әр-Райан қаласындағы "Эдюкейшн Сити" аренасында өткен үшінші тур кездесуінде сары құрлық өкілдері Португалиямен кездесті. Нәтижесінде 5-минутта Рикарду Орта есеп ашса, 27-минутта Ким Юнь Квон таразы басын теңестірді. Үзілістен кейін кореялықтар көбіне қорғаныста ойнап, қарымта шабуылдарға көңіл бөлді. 91-минутта Сон Хын Мин жылдам қарымта шабуылға шығып, үш қорғаушының арасынан Хван Хи Чхванға әдемі пас шығарды. Ал "Вулверхэмптон" шабуылшысы жеңіс голының авторы атанды.
Осылайша, Н тобында 4 ұпаймен екінші орын алған кәрістер енді турнирдің 1/8 финалында Бразилиямен кездеседі.