Мысыр футбол қауымдастығы (EFA) 2026 жылғы әлем чемпионатының 1/8 финалындағы Аргентинаға қарсы матчтан (2:3) кейін француз төрешісі Франсуа Летексьенің жұмысына байланысты ФИФА-ға ресми шағым жолдады, деп хабарлайды Vesti.kz.
AS басылымының мәліметінше, мысырлық тарап жеңіліске төрешілерді кінәлап, оларды турнирдің соңына дейін қызметінен шеттетуді талап еткен.
Мысырдың наразылығы неден туындады?EFA президенті Хани Абу Рида ФИФА-ға ресми хат жолдап, кездесуге қызмет көрсеткен франциялық төрешілер бригадасының әрекетіне қатысты тергеу жүргізуді талап етті.
Мысыр тарапының басты талабы – Франсуа Летексье бастаған төрешілер бригадасын әлем чемпионатының қалған матчтарынан толықтай шеттету.
Олардың пікірінше, ойын барысында Аргентина құрамасының пайдасына қабылданған бірнеше маңызды шешім кездесудің қорытынды нәтижесіне тікелей әсер еткен.
ФИФА төрешілеріне қатысты сын күшейдіAS мәліметінше, Мысырдың наразылығы әлем чемпионатындағы төрешілікке байланысты туындаған даулардың жалғасы болды. Бұған дейін Бельгия тарапы мен УЕФА өкілдері де төрешілердің жұмысына қатысты сын айтқан.
Спорт сарапшылары қазіргі мундиальда төрешілік сапасына байланысты алаңдаушылық артып келе жатқанын атап өтуде.
Еске салайық, Аргентина ширек финалда Колумбияны жарыс жолынан шығарған Швейцариямен кездеседі. Матч 12 шілдеде өтеді.
Ал ширек финалдың қалған жұптары: Франция - Марокко, Испания - Бельгия және Норвегия - Англия.
Айта кетейік, 2026 жылғы әлем чемпионаты 11 маусымда басталып, 19 шілдеде аяқталады. Турнирдің қазіргі чемпионы – Аргентина құрамасы.