Жозе Моуринью мадридтік "Реал" клубына қайта оралуға жақын. Португалиялық маман команданың болашақ құрамына қатысты өз жоспарын да құра бастапты, деп хабарлайды Vesti.kz.
Fichajes.net мәліметінше, Моуринью "корольдік клуб" басшылығына жазғы трансферлік кезеңде күшейткісі келетін негізгі позицияларды атап өткен. Әсіресе, бапкер қақпашыларға ерекше көңіл бөліп отыр. Негізгі үміткер ретінде Диогу Кошта қарастырылуда.
Дереккөздің хабарлауынша, "Порту" қақпашысы Моуриньюдің басты трансферлік мақсаттарының бірі саналады және маман оны келесі маусымда Мадридте көргісі келеді.
Сондай-ақ, бапкердің қалап отырған ойыншылар тізіміне Антониу Силва да енген. Қазіргі уақытта ол Бенфика сапында өнер көрсетеді.
Испаниялық басылымдардың жазуынша, Моуринью португалиялық менталитет пен ойын стилін жақсы білетін футболшыларға сенім артпақ. Оның пікірінше, дәл осындай ойыншылар қиын маусымнан кейін "Реалға" тұрақтылық пен мінезді тезірек қайтара алады.
Мәліметке сәйкес, клуб президенті Флорентино Перес аталған трансферлерді жүзеге асыру мүмкіндігін зерттеп жатыр. Әсіресе, Еуропадағы ең үздік жас қақпашылардың бірі саналатын Диогу Коштаға клуб ерекше қызығушылық танытуда.
Диогу Кошта - Порту командасының капитаны әрі көшбасшыларының бірі. Ол клубпен бірге бірнеше ұлттық трофей жеңіп алды. Атап айтқанда, Португалия чемпионатын 2019/20 және 2021/22 маусымдарында ұтып, ел кубогы мен лига кубогын да иеленген.