"Алтын доптың" сегіз дүркін иегері Лионель Месси америкалық "Интер Майами" клубынан кетіп, келесі жылы бала кездегі футболға қадамы басталған клубына оралуы мүмкін, деп хабарлайды Vesti.kz.
Месси өз клубына орала ма?Журналист Гонсало Кальвильонидің мәліметінше, "Ньюэллс Олд Бойз" клубы Мессиді командаға қайтару жұмыстарын жандандырып жатыр. Хабарламада 39 жастағы шабуылшының дәл қазір аргентиналық клубқа ауысу мүмкіндігі бұрынғыдан да жоғары екені айтылған. Клуб басшылығы футболшымен 2027 жылдың қаңтарында келісімшарт жасасуды көздеп отыр.
Мессидің ұстанымы"Месси "Ньюэллс Олд Бойзға" оралуға бұрын-соңды осынша жақын болған емес. Клуб оны 2027 жылдың қаңтарында қатарға қосуға үміттеніп отыр", - деді Кальвильони Cadena 3 Rosario радиостанциясының Estadio 3 бағдарламасында.
Алайда инсайдер Фабрицио Романоның хабарлауынша, Месси клубын ауыстыруды жоспарлап отырған жоқ.
Дереккөздің мәліметінше, футболшының өзі де, отбасы да жақын арада Аргентинаға оралуды қарастырып отырған жоқ. Месси 2028 жылдың желтоқсанына дейін жарамды "Интер Майамимен" келісімшартын толық орындауды көздеп отыр.
Мессидің клубтық карьерасыЕске салайық, Месси футболдағы алғашқы дайындығын "Ньюэллс Олд Бойз" академиясында алғанымен, негізгі команда сапында бірде-бір матч өткізген жоқ. 2000 жылы аргентиналық футболшы "Барселона" жүйесіне ауысып, каталондық клубта 21 жыл өнер көрсетті.
"Барселонадан" кеткеннен кейін Месси Францияның "Пари Сен-Жермен" клубында екі маусым ойнады. Ал 2023 жылдың жазынан бері "Интер Майами" сапында өнер көрсетіп келеді. Америкалық клуб құрамында ол барлық турнирде 122 матчқа қатысып, 106 гол соқты және 58 нәтижелі пас берді.