Аңызға айналған аргентиналық футболшы Лионель Месси өз бизнес-империясын кеңейтуді жалғастыруда. "Алтын доптың" сегіз дүркін иегері Каталониядағы ең танымалдардың бірі, жас таланттарды тәрбиелеуімен әйгілі "Корнелья" футбол клубын сатып алды, деп хабарлайды Vesti.kz.
"Корнелья" клубының ресми баспасөз қызметі мәміленің аяқталғанын растады: енді Лионель Месси клубтың толыққанды иесі атанды. Бұл қадам Леоның мансабының басым бөлігін өткізген Барселонамен тығыз байланысының заңды жалғасы ретінде бағалануда. Футболшы өкілдерінің айтуынша, жоба жергілікті спортты дамытуға және аймақтағы жасөспірімдер футболына инвестиция тартуға бағытталған.
Неге дәл "Корнелья"?1951 жылы құрылған "Корнелья" клубы Испанияда жастармен жұмыс істеудің үлгісі саналады. Жартылай кәсіби мәртебесіне қарамастан, бұл клуб үнемі жоғары деңгейдегі чемпионаттарға ойыншылар дайындап шығарады. Ең танымал түлектері:
• Давид Райя ("Арсенал");
• Жорди Альба ("Барселонаның" экс-ойыншысы);
• Хави Пуадо ("Эспаньолдың" экс-ойыншысы);
• Жерар Мартин ("Барселона").
Мессидің келуі клубта ауқымды өзгерістердің басталуын білдіреді. Стратегиялық жоспар тек қаржылық тұрақтылықты қамтамасыз етуді ғана емес, сонымен қатар, клубты Мессидің халықаралық бастамаларына біріктіруді көздейді. "Корнелья" Лео ұйымдастыратын турнирлер жүйесінің бір бөлігіне айналады деп жоспарлануда. Солардың бірі - Messi Cup, оның алғашқы турнирі былтыр желтоқсан айында Майамиде өтіп, оған "Барселона", "Челси" және "Манчестер Сити" академиялары қатысқан болатын.
Мессидің үшін Барселона маңындағы клубты сатып алу - "үйдегі" жоба. "Корнельяның" инфрақұрылымы "Барселона" клубының нысандарына өте жақын орналасқан. Бұл аргентиналықтың алдағы уақытта Каталония астанасына спорттық функционер ретінде оралу жоспары бар екенін аңғартады.