Лионель Месси Аргентина ұлттық құрамасындағы өнерін аяқтайтынын мәлімдеді. "Алтын доп" иегері бұл шешімін әлеуметтік желідегі парақшасында жариялап, оның өзіне оңайға түспегенін атап өтті, деп хабарлайды Vesti.kz.
"Финалдан кейін болған жағдайдан соң ұзақ ойландым. Енді баршаңызға ұлттық құрамадағы карьерамды аяқтайтынымды айтқым келеді. Бұл ауыр шешім болды және оның салмағы әлі де сезіледі. Алайда қазір мұндай қадамға баратын уақыт келгенін түсінемін. Мен осы жейде үшін әрдайым бар күшімді салдым. Бұл тек соңғы жылдарға, біз барлық жүлдені жеңіп алған кезеңге ғана қатысты емес, бұған дейін де ұлттық құрама үшін барымды бердім.
Мен әрқашан сіздерге қуаныш сыйлап, аргентиналық екендеріңізді мақтан тұтуға себеп болу үшін күрестім. Енді аз ғана уақыт қалды, кейбір тараулар жабылып жатыр. Ал бұл тарау менің жүрегімді қатты ауыртады. Маған ұлттық құраманың бір бөлігі болу ұнайтын, қазір де солай және оны әрдайым солай болмақ. Мен барымды бердім, енді берерім қалған жоқ.
Сонымен қатар, артымнан келе жатқан өте талантты жас ойыншылар бар. Олар өз мүмкіндікке лайық. Осы 20 жыл бойғы махаббаттарыңыз үшін рақмет", - деп жазды Месси Instagram желісінде.
Футболшы ұлттық құрамаға енді жанкүйер ретінде қолдау көрсететінін айтты. Ол Аргентина құрамасын жақсы күндерінде де, қиын сәттерінде де сырттай қолдайтынын жеткізді.
Месси сондай-ақ осы күрделі әрі керемет жолда әрдайым қолдау көрсеткен отбасына алғысын білдірді. Бұдан бөлек, бірге жұмыс істеген бапкерлер, командаластарына және ұлттық құрама басшылығына ризашылығын жеткізді.
Аргентиналық жұлдыз ұмытылмас естеліктер мен ерекше сәттерді мәңгі есіне сақтайтынын айтты. Ол карьерасын жанкүйерлерге ертегідей сәттер сыйлай алғаны үшін мақтанышпен әрі көңілі тыныш күйде аяқтап жатқанын айтты.
Месси бұл оқиғалардың барлығын Аргентина жанкүйерлерімен бірге бастан өткергеніне бақытты екенін де атап өтті.
Футболшы бұл жазбасын 21 шілдеде, финалдан екі күн өткен соң жазғанын нақтылады. Оның айтуынша, әкесіне қатысты болған жағдайдан кейін ол қабылдаған шешімінің дұрыстығына одан сайын көз жеткізген.
Аргентина құрамасының сапында Месси 2022 жылы әлем чемпионы атанды. Сонымен қатар 2021 және 2024 жылдары Америка кубогын екі рет жеңіп алды. 2022 жылы Финалиссиманы, ал 2008 жылы Олимпиада ойындарының алтын медалін иеленді.
Жарнама