"Манчестер Сити" клубы көшбасшы ойыншыларының бірі - Англия құрамасының жартылай қорғаушысы Фил Фоденмен келісімшартты ұзартуды жоспарлап отыр, деп хабарлайды Vesti.kz.
Журналист Пол Хёрсттің мәліметінше, тараптар жаңа келісім бойынша алдын ала келіссөздерді бастап кеткен.
25 жастағы футболшының қазіргі келісімі 2027 жылдың жазының соңына дейін жарамды. Дегенмен "қалалықтар" клуб түлегін ұзақ мерзімге сақтап қалуды көздейді. Соңғы маусымдардағы ойын деңгейінің төмендеуіне қарамастан, "Сити" басшылығы Фоденге толық сенім артып отыр.
Фоден — "Манчестер Сити" академиясының түлегі. Ол жас кезінен негізгі құрамда орнығып, Хосеп Гвардиола дәуірінің символдарының біріне айналды. "Аспан-көк" сапында ол алты рет Англия чемпионы атанып, Чемпиондар лигасын жеңіп алды. 2024 жылы жартылай қорғаушы АПЛ маусымының үздік ойыншысы деп танылған.
Ағымдағы маусымда Фоден барлық турнирлерде 45 матч өткізіп, 10 гол соғып, бес нәтижелі пас берді. Transfermarkt порталы оның нарықтық құнын 80 миллион еуроға бағалап отыр.