Босния және Герцеговина құрамасының бұрынғы футболшысы Марко Топич әлем чемпионатына іріктеу кезеңі аясында отандастарының Қазақстан құрамасына қарсы кездесуі туралы ойымен бөлісті, деп хабарлайды Reprezentacija порталы. Ол команданың бас бапкері Ивайло Петев ойыннан кейін жылап жіберуге шақ қалғанын айтты.
- Өте өкінішті. Нәтиже көңілден шықпайды. Бапкер футболшыларды жақсы дайындаған. Өздеріңіз де көрдіңіздер, бірінші таймда біздің кем дегенде екі не үш гол соғатын мүмкіндігіміз болды. Бірақ доп қақпаға кірмей қойды. Мұндай мүмкіндік болған кезде әдетте Джеко да соғатын еді. Өкінішті. Бірақ ештеңеге шағым айта алмаймыз.
- Команданың бас бапкері Ивайло Петев өте эмоционалды болды. Кейбір мамандар оның жұмысын мақтағанымен сын айтатындар да бар. Бұл туралы не айтасыз?
- Балкан түбегі елдерінде бапкерлер мен мамандар өте көп. Петев құраманың бас бапкері болып тағайындалған кезде негатив өте көп болды. Бірақ ол тыныш қана өзінің жұмысын істеді. Бүгін біз ұлттық құрама сапында көптеген жас ойыншыларды көрдік. Бұл маманға өз жұмысымен айналысуға мүмкіндік беру керек. Ол жақсы бапкер. Командамен жақсы нәтижеге қол жеткізеді деп сенемін. Ивайло ойын кезінде өте эмоционалды. Баспасөз мәслихаты кезінде ол жылап жіберейін деп қалды. Петев бұған дейінгі бапкерлерден еш кем емес.
– Босния және Герцеговина құрамасы іріктеуде біраз ойын өткізіп тастады. Енді команданың топтан шығу мүмкіндігі қандай?
- Өмірде ылғи жақсы нәрсеге үміттенесің ғой. Жақсы жұмысқа, жақсы жалақыға деген секілді. Біз де топтан шығамыз деп үміттенемін. Турнир кестесіне қараңыздар. Украина құрамасы бес ойыннан кейін бес ұпай жинайды деп кім ойлады? Ал бұл команда екінші орынның басты фовариті еді.