Қазақстанға келмекші болған "Ньюкасл" клубының бұрынғы ойыншысы Қытайда жаттығу кезінде қайтыс болды

Sky Sport коллажы

Қытайлық "Бейцзин Энтерпрайзес" клубының жартылай қорғаушысы Шейк Тиоте 30 жасында өмірден озды, - деп хабарлайды Sky Sport.

Бүгін, 5 маусымда Тиоте жаттығу кезінде құлап, есінен танып қалған. Футболшыны дереу ауруханаға жеткізген, алайда оны құтқарып қалу мүмкін болмаған.

"Бейцзин Энтерпрайзес" командасына Тиоте ақпанда келген. Кот-д'Ивуар құрамасының жартылай қорғаушысы пекиндік клуб үшін бірде-бір ойынға қатыса алмады.

Тиотенің қайтыс болғаны туралы оның агенті Эмануэле Палладино растап берді. Оның айтуынша, футболшының неден қайтыс болғаны әзірге белгісіз. 21 маусымда Тиотенің жасы 31-ге келетін еді. Қытайға келместен бұрын Тиоте жеті жыл бойы "Ньюкасл" сапында өнер көрсетті. 138 ойынға қатысып бір рет гол салған. 2011 жылы 5 ақпанда ол жалғыз голын Арсенал (4:4) қақпасына салған.

"Ньюкасл" командасы Тиотенің отбасына көңіл айтты. "Біз ешқашан сені ұмытпаймыз Шейк!", - делінген клубтың әлеуметтік желідегі парақшасында.

Әлеуметтік желілерде бөлісу