Қазақстанға ақша үшін бардым, бірақ, алаңдары сұмдық күйде - "Ақжайықтың" бұрынғы ойыншысы

Артур Карашаускас. © lff.lv

"Ақжайықтың" бұрынғы шабуылшысы Артур Карашаускас TVNet.lv сайтына берген сұхбатында Қазақстанда өткізген уақыты жайлы айтты.

Латвия құрамасының форварды оралдық клуб сапында 2018 жылы ойнаған. ҚПЛ-дегі 14 матчте ол екі гол салды, алайда, "Ақжайық" маусымды соңғы аяқтап, бірінші лигаға түсіп қалды.

"Жағдай солай болды, Қазақстанға бардым. Оның үстіне қаржылық мәселе де маңызды болды. Мұны жасырған емеспін. Қазақстан чемпионатының соңғы командаларында да легионерлерге бізден көп төлейді", - дейді Карашаускас.

Латвиялық футболшының Қазақстаннан әсері керемет емес екен.

"Алаңдары сұмдық, ары-бері жүру ауыр - ойынға ұшасың, одан кейін үш сағат автобуста, ертесінде ойнайсың да, қайта артқа. Сонда тәулік бойы ұйықтамайсың. Кей қалаларда әуежай жоқ және Астанаға түні бойы автобуспен бару керек болады. Демалысыңда ұйқыңды қандырасың. Бұл ауыр. Мұндайға үйренбегенмін", - дейді латвиялық.

"Ақжайыққа" дейін Карашаускас "Олимп", "Сконто", "Лиепая" мен "Глубене", швейцариялық "Виль", ресейлік "Рубин" және украиналық "Днепр" сапында болды. Соңғы екі клубта жалға алу құқымен ойнады, сондықтан алғашқы команда сапында шықпады. Футболшының сөзінше, "Днепрде" Евгений Коноплянкамен бәсекелестіктті ұта алмайсың - "мүмкіндік жоқ", ал Ресейде өзіндік жағдай.

"Онда өз мафиясы". Көмектесетін өз адамдарың болу керек. Екі рет мәскеулік "Динамоға" трансферім үзіліп кетті", - дейді ол.

Карашаускас Латвия құрамасы үшін жалғыз голды "Ақжайық" ойыншысы болып жүргенде салды - Ұлттар лигасы матчінде Қазақстан құрамасы қақпасына (1:1).

Осы аптада 27 жастағы Карашаускас кипрлік "Пафос" клубына қосылды.

Әлеуметтік желілерде бөлісу