Қазақстан тумасы Александр Тарханов "Енисей" футбол командасының бас бапкері қызметіне тағайындалды, - деп хабарлайды клубтың баспасөз қызметі.
Красноярлық клуб 65 жастағы маманмен келісімшартқа бапкер қалаға келген соң қойылатынын хабарлады. Өткен маусымда "Енисей" Ұлттық футбол лигасында - Ресейдің екінші деңгейдегі чемпионатында 14-ші орында болды.
Айта кетейік, Тарханов БҚО-ның Қазақстан ауылында (1967 жылы атауы Ақсу болып өзгертілді) дүниеге келген. Бес жасында отбасымен Красноярск қаласына қоныс аударған.
Тарханов ЦСКА, "Торпедо", "Ахмат", "Крылья Советов" пен "Урал" сияқты ресейлік командаларды жаттықтырған. Сондай-ақ, өзбекстандық "Пахтакор", литвалық "Ветра", болгариялық "Славия" мен армениялық "Пюник" клубтарында бапкер болған.1990-шы жылдары маман "Спартак" пен Ресей құрамасының бапкерлер штабында қызмет еткен.
Ал "Енисей" сапында Тарханов 1972 мен 1975 жылдары футболшы ретінде өнер көрсетті, ол кездегі команданың атауы "Автомобилист" болатын.