Өзбекстан құрамасының бас бапкері Фабио Каннаваро 2026 жылғы әлем чемпионатының топтық кезеңіндегі Португалияға қарсы матч алдында пікірін айтты, деп хабарлайды Vesti.kz.
Итальяндық маманның айтуынша, команда турнирдің фавориттерінің бірі саналатын қарсыласпен қатаң тәртіппен ойнауы керек.
"Португалия барлық жағынан мықты. Біз мұндай қарсыласпен қалай ойнау керегін түсінуіміз қажет. Алаңда мақсатсыз жүгіре беруге болмайды. Мұндай командамен ойнағанда бәрін ескеру керек. Біз бар күшімізді салуымыз және қателікті азайтуымыз қажет. Тек сол жағдайда ғана матч соңында нәтижеге көңіл толады", - деді Каннаваро Globo басылымына берген сұхбатында.
Айта кетейік, Португалия мен Өзбекстан арасындағы кездесу 23 маусым күні әлем чемпионатының топтық кезеңі аясында (K тобы) өтеді. Ойын Астана уақытымен 22:00-де басталады.
Бірінші турда португалиялықтар күтпеген жерден ұпай жоғалтып, ДР Конгомен 1:1 есебімен тең түсті.
Ал Өзбекстан құрамасы Колумбиядан 1:3 есебімен ұтылып, енді плей-офф кезеңіне шығу мүмкіндігін сақтау үшін ұпай жинауға мәжбүр.