Италияда Роналдудың ауысуына байланысты футбол ойындарының билеті қымбаттады

Италиялық "Кьево" футбол клубы Криштиану Роналду ауысып келгеннен кейін "Ювентус" клубымен өтетін ойынның билеттерін 50 пайызға қымбаттатқан. Бұл туралы sportmediaset.it хабарлады.

Басылымның мәліметінше, алдыңғы орындардың бағасы 100-ден 150 евроға қымбаттаған. Ал трибунаның жоғарғы қабатындағы орындар 40 евродан 60 евроға көтерілді, ортадағылары 30-дан 50 евроға өскен. 

Tuttosport.com мәліметтері бойынша, "Парма" да осы себепті билеттерін қымбаттатқан, бұл клуб 2 қыркүйекте "Ювентусты" қабылдайды.

Айта кетейік, 10 шілдеде Роналду "Реал" клубынан "Ювентус" клубына ауысқан болатын. Ол Италияда жылына 30 миллион евро алатын болады. Форвардтың ауысқаны үшін италиялық клуб 100 миллион евро төлеп, 12 миллион қосымша шығынға батты. Есесіне жаңа ойыншының футболкаларын сатудан бір аптада 54 миллион евро түскен.