Каталондық "Барселона" келесі жазда миландық "Интер" мен Италия құрамасының қорғаушысы Федерико Димарконы еркін агент ретінде қатарға қосуды көздеп отыр, деп хабарлайды Vesti.kz.
Димарко "Барселонаға" тегін ауысуы мүмкінДимарконың "Интермен" қазіргі келісімшарты 2027 жылдың жазына дейін жарамды. Егер тараптар келісімді ұзарту жөнінде ортақ мәмілеге келе алмаса, 28 жастағы қорғаушы миландық клубтан еркін агент ретінде кете алады.
"Барселона" италиялық футболшыға қазірдің өзінде қызығушылық танытып, оны трансферлік өтемақы төлемей-ақ қатарға қосу мүмкіндігін қарастырып отыр. Сонымен қатар Димарконың өзі де "Камп Ноуға" ауысуға мүдделі екені айтылуда.
Бұған дейін "Интер" "Барселонаның" Димарко бойынша ұсынысын қабылдамағаны хабарланған болатын. Миландық клуб команданың негізгі ойыншыларының бірін сақтап қалуды көздеп отыр. Сондай-ақ "Интер" италиялық футболшымен келісімшартты ұзарту бойынша жұмыс жүргізуде.
"Интердің" түлегі команда көшбасшысына айналдыДимарко - "Интердің" түлегі. Ол жас кезінен клуб жүйесінде тәрбиеленді. Алайда карьерасының алғашқы кезеңдерінде италиялық қорғаушы бірнеше рет басқа командаларға жалға берілді.
2017 жылы қорғаушы швейцариялық "Сьонға" 3,91 миллион еуроға ауысты. Алайда бір жылдан кейін "Интер" кері сатып алу мүмкіндігін пайдаланып, футболшыны 5 миллион еуроға қайта қатарға қосты.
Димарко "нерадзурридің" негізгі құрамында 2021 жылдан бастап тұрақты ойнай бастады. Содан бері ол команданың маңызды ойыншыларының біріне айналып, Италия чемпионатын екі рет жеңіп алды.
Басталып үлгерген А сериясының жаңа маусымында италиялық футболшы екі турға қатысты.
Transfermarkt мәліметінше, Димарконың нарықтағы құны 50 миллион еуроға бағаланады. Ал "Барселона" футболшы миландық клубпен келісімшартын ұзартпаған жағдайда, "Интердің" көшбасшыларының бірін трансферлік өтемақысыз қатарға қосуы мүмкін.