Норвегия құрамасы футболдан 2026 жылғы әлем чемпионатының I тобынан плей-офф кезеңіне өткен екінші команда атанды, деп хабарлайды Vesti.kz.
Бұған дейін келесі кезеңге жолдаманы Франция құрамасы мерзімінен бұрын қамтамасыз еткен болатын.
Топтық кезеңнің екінші туры аясында Норвегия Сенегал құрамасын ұтты. АҚШ-тың Нью-Йорк қаласында өткен кездесу 3:2 есебімен аяқталды.
Матчтағы алғашқы голдың авторы Маркус Педерсен болды. Ол 43-минутта сенегалдық футболшылардың қателігін тиімді пайдаланып, қақпаны дәл көздеді.
Үзілістен кейін командалар алаңға орала салысымен, 48-минутта Эрлинг Холанд есеп айырмасын ұлғайтты. Норвегиялық шабуылшы допты қақпаның оң жақ бұрышына дәл бағыттады.
53-минутта Сенегал қорғаушысы Исмаила Сарр алыстан тамаша соққы жасап, командасының есеп айырмасын қысқартуына мүмкіндік берді.
Алайда бес минуттан кейін Холанд дубль авторы атанды. Бұл оның әлем чемпионаты-2026 турниріндегі екінші дублі болды.
Қосымша уақыттың 93-минутында Исмаила Сарр да екінші голын соғып, есеп айырмасын тағы да қысқартты. Дегенмен Норвегия жеңісті есепті сақтап қала білді.
Осылайша, Норвегия құрамасы екі матчта алты ұпай жинап, плей-офф кезеңіне жолдама алды. Бұған дейін дәл осындай нәтижеге Франция құрамасы да қол жеткізген еді.
Топтық кезеңнің үшінші турында Норвегия мен Франция өзара кездеседі. Бұл матч I тобындағы бірінші орын иесін анықтайды.
Ал Сенегал мен Ирак құрамалары үшін жағдай қиындай түсті. Дегенмен олардың да келесі кезеңге шығуға мүмкіндігі сақталып отыр. Себебі плей-оффқа топтарда үшінші орын алған құрамалар арасындағы үздік сегіз команда да жолдама алады.
Жарнама