Мюнхендік "Бавария" клубының шабуылшысы Харри Кейн Германия чемпионатында бірегей рекорд орнатты, деп хабарлайды Vesti.kz.
Англиялық футболшы Бундеслиганың алтыншы турындағы "РБ Лейпцигке" қарсы матчта (6:1) гол соғып, екі нәтижелі пас берді. Осылайша, ол командасының ірі жеңісіне үлес қосты.
Тарихи рекорд
Кейн үшін бұл Германия чемпионатындағы 100-матч болды. Осы кездесуде соққан голы оның Бундеслигадағы 102-ші добы болды. Бұл - лигаданың алғашқы 100 матчында тіркелген ең үздік нәтиже.
Бұған дейінгі рекорд Дортмундтың "Боруссия" клубының бұрынғы шабуылшысы Тимо Коницкиге тиесілі еді. Ол Бундеслигадағы алғашқы 100 матчында 72 гол соққан.
Кейн аңыз ойыншының рекордын жаңартты
Бұған дейін Кейн Бундеслигада 100 голға ең жылдам жеткен футболшы атанған еді. Ол үшін ағылшын шабуылшысына небәрі 98 матч қажет болды. Осылайша, Кейн 1977 жылы "Кельн" сапында 100 гол соғу үшін 129 матч өткізген атақты Дитер Мюллердің рекордын жаңартты.
Осы маусымда Кейн барлық турнирде 10 матчқа қатысып, тоғыз гол соғып, алты нәтижелі пас берді.
"Бавария" Бундеслигада жаңа рекорд орнатты
Бұл жеңіс "Баварияға" Бундеслиганың жаңа рекордын орнатуға да мүмкіндік берді. Мюнхендік клуб маусымдағы өз алаңында өткізген алғашқы үш матчта 18 гол соқты.
"Лейпцигті" ойсырата жеңгенге дейін Венсан Компани шәкірттері "Штутгартты" 5:1, ал "Унион Берлинді" 7:0 есебімен ұтқан еді. Осылайша, команда 2020/2021 жылғы маусымда орнатқан өз рекордын жаңартты. Ол кезде "Бавария" өз алаңындағы алғашқы үш ойында 17 гол соққан болатын.
Бұл жеңістен кейін "Бавария" алты турдан соң 14 ұпай жинап, Бундеслига турнир кестесінде бірінші орынға шықты. Дортмундтың "Боруссиясында" да осынша ұпай бар, алайда мюнхендік клуб гол айырмасы бойынша алда келеді: +17 және +7.
Жарнама