Қазақстан футбол федерациясы ұлттық құраманың жаңа бас бапкерін тағайындауға жақын, деп хабарлайды Vesti.kz "Серый CARDINAL" Telegram-арнасына сілтеме жасап.
Мәліметке сәйкес, шетелдік маманмен жүргізілген келіссөздер соңғы аяқталуға жақын. Ал жаңа бас бапкердің ресми таныстырылымы осы аптаның соңына дейін өтуі мүмкін.
Жаңа бас бапкер туралы не белгілі?Кеше белгілі болғандай, Қазақстан футбол федерациясы шетелдік маманмен келіссөздің шешуші кезеңіне жеткен. Федерация жаңа бас бапкерді апта соңына дейін ресми түрде таныстыруды жоспарлап отыр.
Келісімшарт небәрі төрт айға, яғни алдағы іріктеу кезеңі аяқталғанға дейін жасалмақ. Бұл – федерацияның саналы түрде қабылдаған шешімі. Себебі әлем чемпионатынан кейін жетекші бапкерлердің басым бөлігі клубтармен немесе ұлттық құрамалармен келісімшартқа отырған. Сондықтан дәл қазір танымал маман іздеуге уақыт жоғалту тиімсіз деп есептелген.
Сонымен қатар қысқа мерзімді келісімшарт ҚФФ-ға бапкерлер нарығын жан-жақты зерделеп, қыс мезгілінде үміткерлер саны артқан кезде ұлттық құраманың бас бапкері мәселесі бойынша ұзақмерзімді әрі салмақты шешім қабылдауға мүмкіндік береді.
Бапкерлер штабы да негізінен қазақстандық мамандарға сүйене отырып жасақталған. Сабақтастықты сақтау мақсатында бұрынғы штабтың бір бөлігі өз жұмысын жалғастырады, сондай-ақ оған жаңа қазақстандық бапкерлер қосылады. Ал шетелдік маман ел футболын, ойыншыларды және ішкі чемпионатты жақсы білетін жергілікті мамандармен бірге жұмыс істейді.
Бұған қоса, Қазақстан премьер-лигасында қызмет атқарып жүрген бапкерлердің кандидатуралары әдейі қарастырылмаған. Өйткені ел чемпионаты шешуші кезеңіне аяқ басты, сондықтан ешкім клубтардың жұмысына кедергі келтіріп, бапкерлердің чемпиондық атақ пен еурокубок жолдамалары үшін күресіне әсер етуді құп көрмеген.
Қазіргі таңда Қазақстан ұлттық құрамасының бас бапкері қызметі әлі де бос тұр. Команданың соңғы бас бапкері Талғат Байсуфинов болды. Ол Қазақстан футбол федерациясының ресми мәлімдемесінен кейін 22 маусымда қызметінен кетті.
Маман ұлттық құраманы 2025 жылдың қазан айынан бері жаттықтырды. Оның жетекшілігімен Қазақстан құрамасы 2026 жылғы әлем чемпионатының іріктеу кезеңінде үш матч өткізіп, Лихтенштейнді 4:0 есебімен ұтты. Сондай-ақ Солтүстік Македониямен (1:1) және Бельгиямен (1:1) тең түсті.