Армения ұлттық құрамасы 1 маусым күні алдағы жолдастық кездесулерге дайындық аясындағы оқу-жаттығу жиынын бастады, деп хабарлайды Vesti.kz Армения футбол федерациясының баспасөз қызметіне сілтеме жасап.
Қазақстанмен матч Ереванда өтеді
Армения мен Қазақстан құрамалары арасындағы жолдастық кездесу 6 маусым күні Еревандағы Вазген Саргсян атындағы Республикалық стадионда өтеді.
Армения футбол федерациясының мәліметінше, ұлттық құрамаға шақырту алған барлық футболшылар оқу-жаттығу жиынына келіп үлгерген.
Тек Румынияның "Фарул" клубында өнер көрсететін жартылай қорғаушы Нарек Григорян ғана командаға кейінірек қосылады. Ол Ереванға 2 маусым күні келмек.
Қазақстан құрамасы Шымкентте дайындалуда
Айта кетейік, Талғат Байсуфинов жаттықтыратын Қазақстан құрамасы да алдағы ойындарға дайындық жүргізіп жатыр. Қазіргі таңда ұлттық команда Шымкент қаласында оқу-жаттығу жиынын өткізуде.
Қазақстан құрамасының тізіміне 25 футболшы енгізілген.
Венгриямен де ойын бар
Армениямен кездесуден кейін Қазақстан құрамасы тағы бір жолдастық матч өткізеді.
9 маусым күні қазақстандық футболшылар Венгрия құрамасымен кездеседі. Ойын Венгрияның Дебрецен қаласында өтеді.
Жарнама