Бүгін футзалдан Қазақстан мен Черногория құрамалары кездеседі деп хабарлайды Vesti.kz тілшісі. Әлем чемпионатының іріктеу турнирі аясындағы ойында жерлестеріміз жеңіске жеткен жағдайда мундиальға жолдама алады. Ұлттық құрама сапында 2016 жылы Еуропа чемпионатының қола жүлдегері Серік Жаманқұлов бас бапкер Каканың жастарды көбірек шақырғанына ризашылығын білдірді.
"Құрамаға көшбасшылардың біразы келе алмады. Кейбірі жолдың ұзақтығынан, кейбірі жарақат алды дегендей. Дейтұрғанымен негізгі құрамның ойыншылары бар. Бұрындары тек бір құраммен ойнай беретін. Қазіргі бапкерлік штабтың істеп жатқанын құптаймын. Өзгеріс бар. Басқа да жас ойыншыларды шақырып жүр. Әрине, басты мақсат – жақсы нәтиже көрсету. Алайда әр кездесуде әр балаға мүмкіндік беріліп жатыр. Құрамаға жастар тартылуда. Жаңа есімдер бар. Осы орайда жастар да негізгі командаға бекерден-бекер шақырту алмағанын түсіну керек. Бапкер құрамаға шақырған барлық ойыншыны алаңға олар да сезінсін деген оймен шығарғысы келеді. Егер жақсы нәтиже көрсетіп жатсақ, енді шақыртылып жатқан жастар паркетке шығып сенімді ақтайды деп ойлаймын. Ал Қазақстан мен Черногория матчінде біздің жігіттер жеңіске жетуі тиіс. Ұлттық құрамаға қолдау көрсетейік", - деді Жаманқұлов.
Еске салайық, Қазақстан мен Черногория матчін бүгін Астана уақытымен 20.00 бастап QAZSPORT телеарнасының тікелей эфирінен тамашалай аласыздар.