Норвегия құрамасы мен "Манчестер Сити" шабуылшысы Эрлинг Холанд 26 жасында Англиядағы және халықаралық аренадағы жетістіктері үшін Гиннестің рекордтар кітабының бірден төрт сертификатына ие болды, деп хабарлайды Vesti.kz.
Холандтың АПЛ-дегі рекордтары
Marca мәліметінше, Холанд орнатқан басты рекордтардың бірі оның Англия премьер-лигасындағы нәтижелілігіне қатысты. Норвегиялық футболшы турнир тарихында 100 гол межесіне ең жылдам жеткен ойыншы атанды.
Шабуылшы мерейтойлық 100-голын 2025 жылғы 2 желтоқсанда "Фулхэмге" қарсы ойында соқты. Англия чемпионатында жүз голға жету үшін Холандқа "Манчестер Ситидегі" дебютінен кейін небәрі 111 матч қажет болды.
Норвегиялық футболшы Англиядағы алғашқы маусымында-ақ тағы бір рекорд орнатты. Ол 2022/23 жылғы чемпионатта 38 матчта 36 гол соғып, Мохамед Салахтың 2017/18 жылғы нәтижесін жаңартты. Египеттік шабуылшы сол маусымда 32 гол соққан болатын.
Сонымен қатар Холанд Энди Коул мен Алан Ширердің көрсеткіштерінен де асып түсті. Екі футболшы да өз уақытында 34 голдан соққан. Алайда ол кезде Англия чемпионатының маусымы 42 турдан тұрған еді.
Холанд Мессидің жетістігін қайталады
Норвегиялық футболшының халықаралық аренада да рекорды бар. Холанд — УЕФА Ұлттар лигасы тарихындағы ең үздік сұрмерген. Ол 2020-2024 жылдар аралығында турнирде 19 гол соқты.
Төртінші жетістік Холандты Лионель Месси және Луис Адрианомен байланыстырады. Норвегиялық футболшы Чемпиондар лигасының бір матчында бес гол соққан ойыншылардың қатарына кіреді. Ол мұндай нәтижеге 2023 жылғы 14 наурызда "РБ Лейпцигке" қарсы кездесуде қол жеткізді.
Шабуылшы 2026 жылғы әлем чемпионатында Норвегия құрамасы сапындағы жарқын ойынынан кейін жаңа маусымды бастағалы тұр. Турнир барысында Холанд әлем чемпионатының назарға іліккен ойыншыларының біріне айналды.
Сонымен қатар футбол алаңынан тыс жерде де Холандтың танымалдығы айтарлықтай артқаны атап өтілді. Әлем чемпионаты кезінде норвегиялық футболшының Instagram желісіндегі аудиториясы шамамен 24 миллион жазылушыға көбейді.
Айта кетейік, Холанд "Манчестер Ситиге" ауысқалы бері 198 матч өткізіп, 162 гол соққан. Норвегиялық шабуылшының ағылшын клубымен келісімшарты 2034 жылға дейін жарамды. Ал Transfermarkt оның қазіргі нарықтық құнын 220 миллион еуроға бағалап отыр.
Жарнама