"Барселона" Чемпиондар лигасының 1/8 финалына жолдама алды, алайда, команданың басты проблемасы тағы да көрініп қалды, деп хабарлайды Vesti.kz.
Жалпы кезеңнің соңғы турында даниялық "Копенгагенді" 4:1 есебімен ұту арқылы каталондық клуб топ-8 қатарына еніп, плей-оффтың қосымша кезеңінсіз бірден 1/8 финалға өтті.
Соған қарамастан, Ханси Флик шәкірттері бұл ойында да өз қақпасын "құрғақ" сақтай алмады.
Оның үстіне, каталондықтар матчта тағы да голды бірінші болып жіберіп алды - даниялықтар есепті ойын басында-ақ ашты. Кейін алаң иелері жағдайды өз пайдасына шешіп, Роберт Левандовски, Ламин Ямаль, Рафинья және Маркус Рэшфордтың голдарының арқасында жеңіске жетті.
Sport.es мәліметінше, жалпы кезең қорытындысында "Барселона" бірде-бір матчта қақпасын "бүтін" сақтай алған жоқ. Сегіз кездесуде команда 16 ұпай жинап, 22 гол соғып, 14 гол жіберді - бұл алғашқы сегіздікке кірген клубтар арасындағы ең әлсіз қорғаныс көрсеткіші.
Бұл мәселе жүйелі сипатқа ие. Флик бапкерлік еткен кезеңде Чемпиондар лигасында өткен 22 матчта "Барса" 38 гол жіберген. Бір қателіктің өзі жарыстан шығып қалуға себеп болуы мүмкін турнирде бұл жағдай алаңдатарлық белгі.
Сол үшін каталондықтар шабуылы қуатты, турнир фавориттерінің бірі саналса да, Будапешттегі финалға апарар жолдағы басты міндет - қорғаныстағы ойынды тұрақтандыру болып отыр.