Бүгін, 22 шілдеде алматылық "Қайрат" Чемпиондар лигасының екінші іріктеу кезеңі аясында финляндиялық КуПС командасымен сырт алаңда ойнайды, деп хабарлайды Vesti.kz.
Бұл кездесудің маңызы - тек келесі іріктеу кезеңіне шығу ғана емес, сонымен қатар, Конференция лигасының топтық кезеңіне қатысу кепілдігі де тұр. Егер ары қарай турнирден шығып қалса да, КуПС – "Қайрат" текетіресінің жеңімпазы кепілді түрде еурокубоктық күзге қатысады.
Екі команда да іріктеудің алғашқы кезеңінен сәтті өтті. Финляндиялық клуб молдовалық "Милсамиден" мықтырақ болып шықты: өз алаңында 1:0 есебімен ұтып, сырт алаңда 0:0 есебімен тең ойнады. Ал "Қайрат" словениялық "Олимпиямен" сырт алаңда 1:1 есебімен тең түсіп, Алматыда сенімді түрде 2:0 есебімен жеңіске жетті.
КуПС пен "Қайрат" арасындағы алғашқы кездесу Финляндияның Куопио қаласында өтеді және ол Қазақстан уақыты бойынша 20:00-де басталады. Матчтың тікелей көрсетілімін Qazsport телеарнасы ұсынады.
Қарымта ойын 29 шілде күні Алматыда өтеді.