Лондонның "Челси" клубы Лиам Росеньормен келісімшартты тоқтатқанын ресми түрде мәлімдеді. Маусым соңына дейін бас бапкер міндетін Калум Макфарлейн уақытша атқарады, деп хабарлайды Vesti.kz.
Бұл шешім команданың сәтсіз сериясына байланысты қабылданған. "Челси" ағылшын премьер лигасында 5 ойын қатарынан ұтылып, бірде-бір гол соға алмады. Бұл клуб тарихында 1912 жылдан бергі аралықта алғаш рет тіркеліп отыр.
Айта кетейік, Росеньор қаңтар айында ғана 2032 жылға дейін ұзақмерзімді келісімшартқа қол қойған еді. Алайда оның жетекшілігімен команда соңғы сегіз ойынның жетеуінде жеңіліп қалды.
Клубтың ресми мәлімдемесінде бұл шешімнің оңай болмағаны, бірақ команданың нәтижесі мен ойыны күтілген деңгейден төмен түсіп кеткені айтылған.
Қазіргі таңда "Челси" 34 турдан кейін 48 ұпаймен турнирлік кестеде 7-орында тұр. Келесі ойынын 4 мамыр күні өз алаңында "Ноттингем Форрест" клубына қарсы өткізеді.