Каталониялық "Барселона" клубының қорғаушысы Жюль Кунде 2025 жылғы "Алтын допты" кім иеленуі керек деген сұраққа өз пікірін білдірді, деп хабарлайды Vesti.kz.
Ямаль "Алтын допқа" лайық па?
Жас командаласы Ламин Ямальдың бұл беделді марапатқа қол жеткізу мүмкіндігі туралы сұраққа жауап берген Кунде әріптесіне қолдау білдірді:
"Мені қиын жағдайға қалдырдыңыздар. Тек мынаны айтқым келеді: егер Ламин "Алтын допты" иеленсе, оған толықтай лайықты. Басқа да тамаша маусым өткізген ойыншылар сияқты", – деп келтіреді Кунденің сөзін Marca.
Кунденің Ямальмен ойыны жайлы пікірі
Сондай-ақ, оң қапталда үнемі испаниялық ойыншымен әрекеттесетін франциялық қорғаушы Ямальдың командалық қабілетін ерекше атап өтті.
"Онымен қарым-қатынасымыз өте жақсы. Ол – нағыз командалық ойыншы, команданың пайдасы үшін көп еңбек етеді. Оған шабуылдауға қуат керек, мен мұны жақсы түсінемін", – деп қосты Кунде.
Өткен маусымда 18 жастағы Ламин Ямаль барлық турнирлерде 55 матч өткізіп, 18 гол соғып, 25 нәтижелі пас берген.
2025 жылғы "Алтын допқа" негізгі үміткер – қазіргі таңда "Пари Сен-Жермен" клубында ойнап жүрген, бұрынғы "Барселона" шабуылшысы Усман Дембеле.
Беделді марапатты табыстау рәсімі 22 қыркүйекте Париж қаласында өтеді.
Қазіргі "Алтын доп" иегері – "Манчестер Сити" клубының және Испания құрамасының жартылай қорғаушысы Родри.
Жарнама