"Пари Сен-Жермен" және Бразилия құрамасының шабуылшысы Неймар каталондық "Барселонаға" қайтып келуге жақын, - деп хабарлайды Globo Esporte.
Ақпарат бойынша, каталондық клуб президенті Хосеп Мария Бартомеу футболшының әкесімен келіссөз жүргізуде. "Барселона" Неймар үшін 100 миллион еуро төлеуге және келісімшартқа үш ойыншыны - форвард Усман Дембеле, хавбек Иван Ракитич және қорғаушы Самуэль Умтитиді қосуға дайын.
Мұның алдында ПСЖ ұтымды келісім болса, Неймарды беруге дайын екендерін жеткізген. 27 жастағы бразилиялық форвардтың агенті Пини Захави футболшыны Испанияға қайтарудың амалын қарастырып жатқаны хабарланған.
Неймар ПСЖ сапында 2017 жылдан ойнап келеді. Өткен маусымда форвард Франция чемпионатындағы 17 ойында 15 гол салды және жеті нәтижелі пас берді. Оның париждік клубпен келісімшарты 2022 жылға дейін жасалған.
