Каталондық "Барселона" клубы "Манчестер Сити" мен Испания құрамасының капитаны Родри Эрнандесті сатып алу мүмкіндігін енді қарастырмайды, деп хабарлайды Vesti.kz.
Каталонияда Родри өз таңдауын жасап қойғанына сенімді
Соңғы айларда Родридің "Барселонаға" ауысуы туралы түрлі ақпарат тарағанымен, клуб басшылығы әлемнің үздік жартылай қорғаушыларының бірі үшін күрестен бас тарту туралы шешім қабылдады.
Marca басылымының мәліметінше, каталондықтар испаниялық футболшының карьерасын басты қарсыласы – мадридтік "Реалда" жалғастыратынына сенімді.
Осыған байланысты "Барселона" 30 жастағы ойыншының трансфері бойынша келіссөз жүргізуді жоспарламай, құрамды күшейтудің өзге нұсқаларына назар аудармақ.
Трансфер қанша тұруы мүмкін?
Бұған дейін испандық БАҚ мадридтік "Реалдың" Родри үшін 65-75 миллион еуро төлеуге дайын екенін хабарлаған болатын. Ал Transfermarkt порталы жартылай қорғаушының нарықтық құнын 55 миллион еуро деп бағалайды.
Родридің "Манчестер Ситимен" жасалған қазіргі келісімшарты 2027 жылдың жазына дейін жарамды.
Қазіргі футболдың басты жұлдыздарының бірі
Родри соңғы жылдары әлем футболындағы ең табысты ойыншылардың бірі саналады. 2024 жылы ол Испания құрамасымен Еуропа чемпионатын жеңіп, "Алтын доп" иегері атанды. Ал 2026 жылғы әлем чемпионатында Испания құрамасының сапында жеңіске жетіп, турнирдің үздік ойыншысы деп танылды.
Жарнама