"Барселона" футбол клубы Рафиньяның денсаулығына байланысты алаңдаушылық таныта бастады, деп жазады Vesti.kz.
AS басылымының мәліметінше, футболшы Бразилия құрамасы сапында Францияға қарсы жолдастық матч кезінде сан бұлшықетін жарақаттап алған. Осыған байланысты маусымдағы маңызды матчтарға қатыса алмауы да мүмкін.
Жолдастық ойында Бразилия 2:1 есебімен Францияға есе жіберді. Рафинья алаңда бірінші таймда ғана ойнады. Дәрігерлер жарақатына байланысты екінші таймда ойнатқан жоқ.
Бұл жағдай клуб үшін алаңдатарлық, себебі бұл – осы маусымдағы алғашқы жарақат емес. Бұған дейін де дәл осындай жарақат алып, шамамен екі ай алаңға шыға алмаған еді. Енді футболшы медициналық тексеруден өтеді, соның нәтижесінде жарақаттың қаншалықты ауыр екені анықталатын болады.
Жарақаты ауыр болса, Чемпиондар лигасындағы "Атлетикоға" қарсы матчқа қатыспауы да мүмкін.
Жарнама