Армения құрамасының төртінші ойыншысы қазақстандық клубқа қосылды

Футболдан Армения құрамасының қорғаушысы Айк Ишханян карьерасын Қазақстанда жалғастырады, - деп хабарлайды ArmFootball.am.

Арменияның футбол федерациясы 30 жастағы ойыншы талдықорғандық "Жетісумен" келісімшартқа қол қойғанын хабарлады. Келісім бір жылға есептелген.

Мұның алдында "Алашкерт" клубы Ишханянмен келісімшартты үзген болатын, бұл футболшының шетелге кедергісіз шығуы үшін жасалды. Осы маусымда ол клуб үшін Армения чемпионатында он матч өткізді.

Ишханян осыған дейін тек Арменияда ойнаған. "Алашкертке" дейін "Лори", "Гандзасар", "Мика", "Импульс", "Ширак" пен "Динамо Ереван" сапында өнер көрсетті. Армения құрамасы үшін 12 ойында бір гол салған.

Осылайша, Ишханян Қазақстан чемпионатындағы Армения құрамасының төртінші ойыншысы. Жаңа маусымда ҚПЛ-де Тигран Барсегян ("Астана"), Камо Оганесян ("Қайрат") пен Петрос Аветисян ("Тобыл") да ойнайтын болады.

Еске салайық, 2020 жылдан бастап ЕАЭО елдерінің (Армения, Беларусь, Қырғызстан мен Ресей) футболшылары легионер ретінде есептелмейді.