Аргентина президенті Хавьер Милей ұлттық құраманың әлем чемпионатындағы өнерін финалдағы жеңіліске қарамастан ерекше атап өтуді ұйғарды, деп хабарлайды Vesti.kz.
Бұл туралы мемлекет басшысы X әлеуметтік желісіндегі (бұрынғы Twitter) парақшасында мәлімдеді. Оның айтуынша, әлем чемпионатының күміс жүлдегерлерінің құрметіне елде ұлттық демалыс күні жарияланады.
Алайда оның нақты күні әзірге белгіленген жоқ. Бұл күнді футболшылар мен бапкерлер штабы өздері таңдайды.
"Аргентина құрамасының жетістігін бірге атап өтуге деген қызығушылықты ескере отырып, құраманың ойыншылары мен бапкерлер штабы мерекелеу үшін таңдаған күн ұлттық демалыс күні болып жарияланатынын азаматтарға хабарлаймын", – деп жазды Милей.
Бір қызығы, ESPN мәліметінше, Аргентина президенті финалдық матчқа қатысқан жоқ. Бұған Аргентина басшылары арасында бұрыннан келе жатқан ырым себеп болған.
Бұл оқиғаның бастауы 1990 жылғы әлем чемпионатынан басталған. Сол кезде елдің бұрынғы президенті Карлос Менем Камерунға қарсы алғашқы ойын алдында ұлттық құраманың орналасқан жеріне барған. Ал әлемнің қазіргі чемпиондары саналған Аргентина күтпеген жерден 0:1 есебімен ұтылып қалған.
Осыдан кейін көптеген жанкүйер Карлос Менемді "сәтсіздік әкелетін адам" деп қабылдай бастады. Содан бері Аргентина саясаткерлері арасында ұлттық құраманың шешуші матчтарына бармау жөнінде жазылмаған дәстүр қалыптасқан.
Еске салайық, 2026 жылғы әлем чемпионатында Аргентина өз тобында бірінші орын алып, кейін плей-офф кезеңінде Кабо-Верде, Мысыр, Швейцария және Англия құрамаларын жеңді. Алайда финалда Лионель Скалонидің шәкірттері Испанияға қосымша уақытта 0:1 есебімен есе жіберді.