Италиялық "Комо" клубында өнер көрсететін жартылай қорғаушысы Николас Пас Аргентина құрамасынан Лионель Месси кеткеннен кейін командадағы атақты 10-нөмірлі жейдені иеленуі мүмкін, деп хабарлайды Vesti.kz.
"Реалдың" түлегі Мессидің 10-нөмірін алуы мүмкін
ESPN Argentina мәліметінше, егер "альбиселестенің" бас бапкері Лионель Скалони келісімшартын ұзартса, Месси халықаралық карьерасын аяқтағаннан кейін 21 жастағы Пас 10-нөмірлі жейдеге басты үміткер болады.
Пас - мадридтік "Реалдың" түлегі. 2024 жылдан бері ол италиялық "Комо" сапында өнер көрсетіп келеді. Аргентина құрамасында жартылай қорғаушы әзірге негізгі құрамның тұрақты ойыншысына айналған жоқ, дегенмен біртіндеп көбірек ойын уақытын алып жүр.
Өткен әлем чемпионатында Пас топтық кезеңде екі матч өткізді. Ол ойындарда футболшы нәтижелі әрекетімен көзге түспеді, ал аргентиналықтар финалға дейін жетіп, турнирді күміс жүлдемен аяқтады.
Жалпы Пас Аргентина құрамасында 11 матч өткізіп, бір гол соққан және бір нәтижелі пас берген.
Месси Аргентина құрамасынан кетті
Бұған дейін 39 жастағы Месси Аргентина құрамасы үшін енді өнер көрсетпейтінін мәлімдеген еді. "Альбиселесте" сапында Лео 2022 жылғы әлем чемпионатында, 2021 және 2024 жылдардағы Америка кубогінде, сондай-ақ 2022 жылғы Финалиссимада жеңімпаз атанды.
Енді Аргентина футболына жаңа көшбасшы табу міндеті тұр. Ал Пас Мессидің аты аңызға айналған 10-нөмірін ғана иеленбей, ұлттық құрамада әлдеқайда маңызды міндет алуы ықтимал.
Жарнама