Америкалық "Интер Майами" клубының шабуылшысы әрі Аргентина құрамасының капитаны Лионель Месси Гондурасқа қарсы жолдастық матчқа қатыспайды, деп хабарлайды Vesti.kz журналист Гастон Эдулға сілтеме жасап.
Жарақат алып, жолдастық ойыннан тыс қалдыДереккөздің мәліметінше, 38 жастағы футболшы жеңіл жарақат алғандықтан, 7 маусымда өтетін ұлттық құраманың жолдастық кездесуіне қатыса алмайды.
Айта кетерлігі, бұл денсаулыққа қатысты күрделі мәселе емес және ұзақ уақыт ем қабылдауды қажет етпейді.
Соған қарамастан, Мессидің 17 маусымда Алжир құрамасына қарсы өтетін әлем чемпионатындағы алғашқы матчқа қатысуына қауіп төніп тұрған жоқ. Аргентина құрамасының капитаны турнир басталғанға дейін толық қалпына келіп, бабына келеді деп күтілуде.
Сондай-ақ, сегіз дүркін "Алтын доп" иегері жақында ұлттық құраманың оқу-жаттығу жиынына келіп, әлем чемпионатына дайындықты бастап кеткені хабарланды.
Аргентина әлем чемпионатына қалай барады?Аргентина құрамасы 2026 жылғы әлем біріншілігіне қазіргі чемпион ретінде қатысады. Алдыңғы мундиальдің финалында аргентиналықтар Франция құрамасын негізгі және қосымша уақыттағы 3:3 есебінен кейін пенальти сериясында жеңген болатын.
Топтық кезеңде "альбиселесте" Алжир, Аустрия және Иордания құрамаларымен кездеседі.
2026 жылғы әлем чемпионаты 11 маусым мен 19 шілде аралығында өтеді. Турнир тарихында алғаш рет бірден үш мемлекет — АҚШ, Канада және Мексика қабылдайды.