Польша құрамасының шабуылшысы Роберт Левандовски карьерасын АҚШ-тың MLS лигасында жалғастырады. "Барселонаның" бұрынғы шабуылшысы ресми түрде "Чикаго Файр" клубының ойыншысы атанды, деп хабарлайды Vesti.kz.
37 жастағы футболшының трансфері туралы Чикаго клубының баспасөз қызметі ресми мәлімдеді. Клуб өкілдері Левандовскиді қазіргі заманның ең үздік шабуылшыларының бірі әрі Польша құрамасы тарихындағы үздік сұрмерген деп атады.
"Біз әлемдік футболдың аңызы әрі Польша құрамасы тарихындағы ең үздік бомбардир Роберт Левандовскимен келісімшарт жасадық", - делінген клубтың X әлеуметтік желісіндегі хабарламасында.
ROBERT LEWANDOWSKI IS COMING TO CHICAGO ??
— Chicago Fire FC (@ChicagoFire) June 29, 2026
We have signed global soccer icon and Poland’s all-time leading goal scorer Robert Lewandowski as a Designated Player ? #cf97 pic.twitter.com/ML5zxz3hVk
"Барселонадағы" кезеңі
Левандовски соңғы төрт маусымда "Барселонаның" намысын қорғады. Оның каталониялық клубпен жасасқан келісімшарты 30 маусымда аяқталды.
Өткен маусымда тәжірибелі шабуылшы барлық турнирде 46 матч өткізіп, 19 гол соғып, төрт нәтижелі пас берді. Жалпы алғанда, поляк футболшысы "Барселона" сапында 193 матчқа қатысып, 120 гол соқты және 24 нәтижелі пас авторы атанды. Каталониялық клубпен бірге ол жеті трофей жеңіп алды. Соңғы маусымында командаға Испания чемпионы атануға көмектесті.
Бұған дейін Левандовски Сауд Арабиясы чемпионатына ауысу мүмкіндігін де қарастырғаны хабарланған еді. Қазіргі уақытта "Чикаго Файр" MLS Шығыс конференциясының турнирлік кестесінде үшінші орында келеді.
Жарнама