Германия құрамасының бұрынғы қорғаушысы Лотар Маттеус 2026 жылғы "Алтын доп" жүлдесін жеңіп алуға басты фаворит деп санайтын футболшыны атады, деп хабарлайды Vesti.kz.
Ол Родри де, Мбаппе де емес
"Родри ӘЧ-2026-ның үздік ойыншысы атанды. Бірақ ол шынымен де ең үздік болды ма? Көбіне ФИФА финал аяқталғаннан кейін марапаттауға болатын ойыншыны таңдайды. Родри чемпион команданың дирижері болды, екі жыл бұрын Испания Еуропа чемпионатын жеңіп, өзі "Алтын доп" иеленген кездегідей. Дегенмен ол биыл бұл жүлдені жеңіп алады деп ойламаймын.
Испанияның ұйымшыл командалық ойынына байланысты марапатты кім алатынын болжау қиын. Менің ойымша, басымдық Усман Дембеледе. Ол ПСЖ сапында тағы да Чемпиондар лигасын жеңіп алды. Килиан Мбаппе әлем чемпионатының үздік сұрмергені атанды, бірақ, "Реалмен" ешқандай трофей жеңген жоқ. Егер "Алтын допты" оған беріп жатса, таңқаларым анық.
Майкл Олисе "Бавария" сапында тамаша маусым өткізді. Ол Бундеслига мен әлем чемпионатының үздік ассистенті атанды. Олисе мен Бундеслиганың үздік сұрмергені Харри Кейн "Бавариямен" бірге "алтын дубль" жасады. Сонымен қатар, екеуі де өз ұлттық құрамаларымен әлем чемпионатының жартылай финалына дейін жетті", – деп жазды Маттеус Sky Sport басылымындағы авторлық бағанында.
"Алтын доп" алғаш рет Парижден тыс жерде табысталады
2026 жылдың 26 қазанында Лондонда кезекті "Алтын доп" марапатын тапсыру рәсімі өтеді. Бұл – сыйлық тарихында алғаш рет Парижден тыс жерде ұйымдастырылатын салтанатты кеш болмақ.
France Football журналы мен УЕФА шараны Англия астанасына көшіру туралы шешім қабылдады. Бұл қадам марапаттың 70 жылдық мерейтойына орай жасалып, алғашқы "Алтын доп" иегері, ағылшын футболының аңызы сэр Стэнли Мэттьюздің құрметіне арналады.
Жарнама