УЕФА (Еуропалық футбол қауымдастықтары одағы) ұлттық құрамалар арасында ФИФА ұйымдастыратын әлем чемпионатына балама болуы мүмкін жаңа жаһандық турнирді өткізу мүмкіндігін қарастырып жатыр, деп хабарлайды Vesti.kz сайты Sky News басылымына сілтеме жасап.
УЕФА мен ФИФА арасындағы келіспеушілік күшейіп келеді
Дереккөздің мәліметінше, бұл бастама екі ұйым арасындағы шиеленістің күшеюіне байланысты қайтадан күн тәртібіне шыққан. Бұған ФИФА-ның әлем чемпионатының коммерциялық құқықтарының бір бөлігін жеке инвесторларға сату жоспары себеп болған.
Егер осы мәселеге байланысты текетірес ушыға түссе, УЕФА әлем чемпионатына бойкот жариялау мүмкіндігін де жоққа шығармайды.
Жоба алғаш рет 2017 жылы ұсынылған
Ақпаратқа сәйкес, УЕФА-ның мұндай халықаралық турнир өткізу жөніндегі дайын тұжырымдамасы бұрыннан бар. 2017 жылы ұйым Жаһандық Ұлттар лигасы жобасын әзірлеген. Алайда бұл бастама жүзеге аспай қалды.
Сол кезде ФИФА президенті Джанни Инфантино негізгі назарды клубтар арасындағы әлем чемпионатын кеңейтуге аударғандықтан, жоба кейінге шегерілген еді.
Жобаға сәйкес, дәстүрлі бір әлем чемпионатының орнына жеті бөлек финалдық турнир өткізу жоспарланған. Әрбір дивизионның финалдық кезеңіне сегіз үздік құрама қатысып, жарыс ширек финалдан басталуы тиіс болған. Турнирлер әртүрлі елдерде ұйымдастырылып, шағын форматтағы бірнеше әлем біріншілігі ретінде өткізілмек.
Жоба авторлары әр дивизиондағы құрамалардың санын да нақты белгілеген.
Әр дивизионда:
Еуропадан – 3 құрама;
Оңтүстік Америкадан – 2 құрама;
Африкадан – 1 құрама;
Азиядан – 1 құрама;
Солтүстік Америкадан – 1 құрама қатысуы тиіс.
Ал Мұхит аралдары аймағының жалғыз өкілі тек төртінші дивизионнан орын ала алады. Еуропалық құрамалар үшін іріктеу кезеңі УЕФА Ұлттар лигасы арқылы өтуі керек еді.
Айта кетейік, бұл турнир 2018 жылы іске қосылды, алайда тек Еуропа құрамаларының қатысуымен өткізілуде.
Енді ФИФА мен УЕФА арасындағы ықтимал текетірес аясында жеті жыл бұрын ұсынылған жаһандық турнир жобасы қайтадан жүзеге асуы мүмкін.
Жарнама