Соңғы әлем чемпионатының жеңімпазы Франция мен сол турнирдің финалисі Хорватия тең түсті, деп хабарлайды Vesti.kz тілшісі.
УЕФА Ұлттар Лигасының А дивизионы аясындағы матчта жеңімпаз анықталмады. Балқан түбегіндегі кездесуде алдымен Парижден келген ойыншылар есеп ашты. 52-минутта "Ювентус" жартылай қорғаушысы Адриен Раббьо Виссам Бен Йеддердің пасын голға айналдырды. Кездесудің 83-минутында Андрей Крамаричке қарсы тәртіп бұзылып, төреші пенальти белгіледі. Нәтижесінде 11 метрлік айып добын орындауда мүлт кетпеген Крамарич таразы басын теңестірді. Қорытынды есеп 1:1.
Еске салайық, 2018 жылы Ресейдегі әлем чемпионатының финалында Франция мен Хорватия құрамалары кездесіп, Дидье Дешам шәкірттері өз тарихында екінші рет әлем чемпионы атанған еді.