45 жылда бірінші рет. "Барселона" Ла Лиганың екі матчінде де "Реалға" гол сала алмады

Мадридтік "Реал" Испания чемпионатындағы каталондық "Барселонамен" кейінгі екі ойында да қақпасына доп өткізбеді. 

Желтоқсанда өткен бірінші айналым ойыны 0:0 есебімен тең аяқталған. Кеше, 1 наурыздағы ойында "Реал" қарымта ойында "Барселонаны" 2:0 есебімен ұтты. 

Осылайша каталондық команда 45 жылда бірінші рет мадридтіктермен екі кездесуде де гол сала алмады. Осыдан 45 жыл бұрын - 1974/75 маусымында да "Реал" қақпашысы Мигель Анхель Гонсалес Суарес екі ойында да бір гол өткізбеген еді. Биылғы чемпионатта "Реал" қақпасын "Барселонамен" кездесуде Тибо Куртуа қорғап қалды. 

Сонымен бірге, "Реал" -1935/36 және 1957/58 маусымдарының қос матчтерінде қақпасына каталондықтардан доп кіргізбеген.

Осы жеңіс арқасында "Реал" 56 ұпай жинап, турнир кестесінде бірінші орынға шықты. "Барселона" 55 ұпаймен екінші және каталондықтардың төрт ойын қатарынан келе жатқан жеңіс сериясы үзілді.