Туриннің "Ювентусы" Франция құрамасының шабуылшысы Рандаль Коло-Муанидің трансфері бойынша Францияның "Пари Сен-Жермен" клубымен түпкілікті келісімге келді, деп хабарлайды Vesti.kz.
Трансфер толық келісілді
Инсайдер Фабрицио Романоның мәліметінше, тараптар ауысымға қатысты барлық мәселені толық реттеген.
27 жастағы шабуылшы маусым соңына дейін "Ювентусқа" жалға беріледі. Сонымен қатар, келісімде футболшыны міндетті түрде сатып алу туралы тармақ қарастырылған.
Коло-Муани осы аптада медициналық тексерістен өтіп, кейін Италия клубымен келісімшартқа қол қояды деп күтілуде.
Туринге қайта оралады
Франциялық шабуылшы үшін бұл "Ювентус" сапындағы алғашқы кезең емес. Ол бұған дейін 2024/25 жылғы маусымда туриндік клубтың намысын жалға алу келісімі негізінде қорғаған болатын.
Ал 2025/26 жылғы маусымды Англияның "Тоттенхэм" клубында өткізіп, барлық турнирде 41 матчқа қатысып, бес гол соғып, төрт нәтижелі пас берді. Енді Рандаль Коло-Муани Италияның ең атақты клубтарының бірі саналатын "Ювентуста" өз орнын қайтадан бекітуге тырысады.
А Сериясының 36 дүркін чемпионы жаңа маусымда француз шабуылшысы команданың шабуыл шебін күшейтеді деп үміттеніп отыр.
Жарнама