Қазақстандық футболшы Омар Мурадов Италияның А Сериясында өнер көрсететін "Болоньемен" келісімшартқа қол қойды, деп хабарлайды Vesti.kz.
18 жастағы жартылай қорғаушы бастапқыда клубтың жастар құрамында өнер көрсетеді. Келісімге сәйкес, алғашқы алты ай бейімделу кезеңі ретінде қарастырылған, содан кейін ойыншы негізгі командаға ауыстырылуы тиіс.
"Болоньяның" жастар командасы Примавера біріншілігінде өнер көрсетеді. Бұл — 20 жасқа дейінгі футболшылар арасындағы қосалқы құрамдар чемпионаты.
Трансфердің мән-жайы
Дереккөздің мәліметінше, Мурадовтың ауысуы бойынша келіссөздер шамамен бір жарым айға созылған. Мәміледе "Болоньяның" спорт директоры әрі италиялық футбол аңызы Марко Ди Вайо шешуші рөл атқарған.
Алайда соңғы таңдауға әсер еткен басты фактор — жеке байланыс болған. Команданың бас бапкері Винченцо Итальяно Омарға жеке қоңырау шалып, соның нәтижесінде қазақстандық ойыншы италиялық клубты таңдаған.
Келісімшарт талаптары
Мурадовтың "Болоньемен" келісімі 2027 жылдың жазында күшіне енеді және үш маусымға есептелген.
Осы уақытқа дейін футболшы итальян тілін меңгеруі тиіс. Ол клубқа еркін агент мәртебесінде қосылады.
Келісімшартта өтемақы сомасы 15 миллион еуро (шамамен 8,7 миллиард теңге) деп көрсетілген.
"Болонья" жас талантқа таласта "Миланның" алдын орап кетті
Дереккөз мәліметіне сүйенсек, Мурадовқа Еуропаның бірнеше алпауыт клубы қызығушылық танытқан. Атап айтқанда, "Милан", Испанияның "Жиронасы" және Ресейдің ЦСКА клубы аталады.
Қаңтар айында Әзірбайжан баспасөзі футболшыға "Астана", "Қайсар" және "Нефтчи" клубтарының да назар аударғанын жазған.
Омар Мурадов кім?
Омар Мурадов 2007 жылдың 17 қазанында Алматы қаласында дүниеге келген. Футболдағы алғашқы қадамын "Қайрат" жүйесінде және жеке меншік "Мустанг" клубында бастаған.
15 жасында Әзірбайжанға қоныс аударып, "Сумгаит" клубына қосылды. Осы командамен U17 санатында ел чемпионы атанды. 2025 жылдың жазында "Араз-Нахичевань" клубының (U19) сапына ауысты.
Мурадов алаңда шабуылдаушы жартылай қорғаушы, яғни "ондық" позициясында ойнайды.
Айта кетейік, футболшы Қазақстанның жасөспірімдер құрамаларына шақырту алмаған. Сондай-ақ оның Transfermarkt және өзге статистикалық платформаларда ресми парақшасы жоқ.
2023 жылы Мурадов Сербияның "Црвена Звезда" академиясында тәжірибеден өткен.
Жарнама