Футболдан Еуропа чемпионатында E тобындағы командалар алғашқы кездесуін өткізді, деп хабарлайды Vesti.kz порталы.
Бұл топтағы бірінші ойында Словакия құрамасы Польшамен кездесіп, 2:1 есебімен жеңіске жетті. Ойын Санкт-Петербург қаласындағы "Газпром Арена" стадионында өтті.
Есепті 18 минутта Словакия құрамасы ашты. Роберт Мак тепкен допты Войцех Щесны өз қақпасына жіберіп алды. Төреші автогол тіркеді. Айта кетейік, бұл Еуропа чемпионаты тарихында қақпашы соққан бірінші автогол болды.
Екінші таймның 46-шы минутында Польша таразы басын теңестірді. Голды Кароль Линетти соқты.
Ал 62-ші минутта Гжегож Крыховяк екінші сары қағаз алып, алаңнан қуылды. Сөйтіп Словкаия құрамасы басымдықты өз қолына алды.
69 минутта "Интердің" қорғаушысы Милан Шкриньяр гол соғып, қонақтар жеңіске жетті.
Еске салайық, Е тобында бұл екі құрамадан бөлек, Испания мен Швеция бар. Олар бүгін Севилья қаласында кездеседі.